قليل الحيلة قاعد ليه؟ شعر/ خميس نصر

فاضل إيه بس نبكي عليه ؟

حصار الخوف هنقضي عليه
صبحنا في زمان التيه
غلبنا معاك يا إبن الإيه
فاضل إيه بس نبكي عليه ؟

آدي الأسعار بتكوينا
والينا موش سائل فينا
حاطط بؤسه وشقاه فينا
صفار البيضة بقى بجنيه

جهاز إعلام بيتباهى
بشلة تافهة بالعاها
وبالأزمات محاوطاها
بتلعب في دماغنا يا بيه

بنستورد أكم أشياء
تزود لينا في الأعباء
نظام فاشل مصاب بغباء
صحيح ولا انتو رأيكو إيه ؟

بيستورد فانوس م الصين
ويمضي كويز مع الملاعين
نظام عاجز ومخه تخين
قليل الحيلة قاعد ليه ؟

بتدي للعدو المحروق
رخيص وبنص سعر السوق
لو انت بتشرب المدعوق
قولولي الناس دى ذنبها إيه ؟

يبيعوا غازنا للأندال
ده بكرة تلعن الأجيال
حكومة بفعلها البطال
تخلي الشعب مديون ليه ؟

آدي الشعب اللي سممتوه
بأمراض الخبيث صبتوه
برغم إن انتو عشمتوه
فاضل إيه بس يبكي عليه ؟

هيتحرك هيتحرك
عبيط برضه السكوت غرك
لمزبلة التاريخ جرك
فاضل إيه بس نبكي عليه ؟

تشفير الجنيه شعر/ خميس نصر

تشفير الجنيه

يا نهار بلاك يا ليل بـــلو عقلي خلاص هيجنـــــنوه
يختار شباك بيها يصيدوه والفكر لاص قرب يــــتوه
يفيد بإيه اللي يقولــــــوه وآدي الجنيه هيشفـــــروه
والشعب ليــــه بيعشموه الإقتصــــــــــاد بيموتوه
والدين كمـــــان بيأمموه وكلام صـــواب بيحرموه
شغــــــل السياسة تقفلوه وفي النجــــــاسة تغرقوه
وبالغلاسة بتحـــــــكموه حتى الرئيس بتــــــورثوه
مسنود حقــــير بيهربوه ما الضعيف بيكتفـــــــوه
سرك في بير لحسن تتوه وبلاش شخير ياناس ياهوه

رسالة لصناع القرار شعر/ خميس نصر

رسالة لصناع القرار


من شباب عاقل لصناع القرار
بعد التحية و السلام
و القُبَل و الاحترام
عاوز أقول بعض الكلام
ماهوأصل لو نسكت يا خلق
هيبقى عار
اسمعوا رأيي بصراحة
و الضمير يسعد براحة
قبل ما تصبح مناحة
بطلوا داء الانكسار
خلوا كلمتنا جريئة
علموا الناس الحقيقة
حرروا الخلق البريئة
رح ننول الانتصار
قاطعوا أعداء البلاد
سرحوا جيش الفساد
خلوا تقوي المولى زاد
تنهضوا م الانهيار
حسوا بالناس الغلابة
واقطعوا رقاب الديابة
احنا دولة مش في غابة
فكوا عن ناسنا الحصار
العدا يا خلق يامة
و الشعوب صارت يتامى
مين يعيد لينا الكرامة
بعد ما هدموا الديار
جرافات عمالة تهدم
و لمدارسنا بتردم
و لشباب أطهار بتعدم
أضرموا في الارض نار
اسمعوا نبض الاهالي
لو نباح الكلب عالي
وابعدوا الندل الضلالي
و ارحموا ضعف الصغار
اللي كان مامعهش حاجة
بالحداقة و السماجة
صار رجل أعمال ألاجة
قول منين جبت الدولار
جزمتي دايبة و هدومي
و الديون تقلقلي نومي
و اللي زود من همومي
كرش للناس الكبار
داخلي كاشش و الولية
عايزة لكن مستحية
شايفة حالي و الماهية
ما يجيبوش حبة خضار
مطحونين و لا حد فاكر
حامد المولى و شاكر
بس كابوس العساكر
خلى نوم الجفن طار
قلت رأيي من ضميري
فرصتي بتروح لغيري
بس يتقرر مصيري
لو صحيح ناخد قرار
ايدنا في ايدين الجميع
نلغي في سياسة القطيع
نقضي على الظلم الفظيع
يدخل البيت العمار
ننتصر للمظلومين
او نداوي المجروحين
نقتدي الهادي الأمين
نمحي عهد الانكسار
ندي فرصة للتصالح
و اللي كان مظلوم يسامح
رح يكون بستاننا طارح
مرحمة تعم الديار
أمتي حبة فؤادي
أي مخلوق في بلادي
حته مني ليه و دادي
بيه يكون الانتصار

درة مشوي .. شعر/ خميس نصر

والله زمان يــــــــــادرة مشوي بشكل جميل
طعمك لذيــــــذ والجنيه على التــــلاتة قليل
غلبان بيشوي ولكـــــن راضي بقلـــــــــيله
لو كان بإيــــدي الألوف حتمت رح أديــــله
إنسان مكافـــح بيصرف دخـــــله على أرطة
وإن كان بيخجل يعيش وولاده في ورطـــــــة
يا ريت بتــوع التفاوض يشووا في بطاطـــــــا
ويسرحوا في البـــــــلد ويبطلوا عبــــــــاطة