جناح الأمل
شعر:خميس نصر
على جناح الأمل مكتوب*سطور بعروقنا نرويها
بتمسح من عيوننا آهات*بدم ودمع نحكيها
وتشرق شمس بكرة نهار*لا يمكن خلق تطفيها
يفيض نهر العمل شلال*يبوس الأرض في عينيها
وتخضّر الربوع وتزين*بلون الزرع صحاريها
ونفرح لما يعلا نخيل*إيدي دفنت تقاويها
ويبقى الورد شكله جميل*وبيزوّد غناويها
ونلقى بطلنا إبن النيل*يقول بالدم أفديها
دا طول عمره كريم وأصيل*وريقه حطب ويسقيها

حزب الشعارات الكدابة شعر:خميس نصر

حزب الشعارات الكدابة
شعر:خميس نصر
حزب اليفط والضرب بالكرابيج
حزب الفساد والنصب والتهريج
حزب العلل والعجزة والقيادات
من مزبلة لمنصة التتويج
المفسدين والمخدوعين تلاتات
متجمّعين بيجهّزوا لترويج
والطبخة محتاجة كتير تحاويج
يا حزب بيجعجع بدونه طحين
شعارات كبيرة لكنه تهريج
جايبين عتاولة ومخهم فاضي
ده ما يصلحوش مجلس محلي مليج
حزب المصالح والحشيش والكيف
ينحلّ من نفسه بدون تدريج

أشكرِك على كل حال شعر:خميس نصر

أشكرِك على كل حال
شعر:خميس نصر
جامعة عيلتك قاعدة تحكي
ولا تشكي
من عمايلي
من جمايلي
وتقولي لهم
قلبه قاسي
طب بلاش إنتي اللي تإسي
ولا تنسي
ياما شفتي من مآسي
لما جيتي كنت جامد
كنت أعند
كنت أساند
كنت باتحايل وأواسي
لما شفتك في المراية
كنتي آية
كنتي فاصل في الرواية
كانت الهدمة اللي بالبسها مقاسي
من ساعتها بدأت أرتب
كل حاجة في حياتي
أبكي واستغفر ليلاتي
أسأل أولادي ومراتي
بانتبه من كل ناسي
أشكرك على كل حال
واذكرك بنت الحلال
ده البياض نص الجمال
وانتي أول شعرة بيضة جت في راسي

بكل العزة باطاطي لهم
شعر:خميس نصر
إلى فريق المطبعين والمفاوضين

ومين قال إن أنا ساكت*ما انا باشخط في أولادي
واعلّي صوتي على أهلي*وبارعب كل أحفادي
وباتهجّم على جاري*واوجه كل أسيادي
بكل العزة باطاطيلهم*وباحني راسي ترّاضي
ولو ضربوني باهدي لهم*بدال الضرب إنشادي
وابهدلهم واغنيلهم*دا غير الشجب وعنادي
وراس الشعب مرفوعة*هدف للمخفي والبادي
وكل الشعب من حقه*يموت هيروح لأجدادي
وإيدي بامدها دايما*وأدبّ كل حسادي
وبابني من جماجمهم*صروح تتعد أمجادي
بكل شموخي باديلهم*قفايا وهوا دا جهادي
وافاوضهم بكل خنوع*مقاومتهم كلام فاضي
مقاومة إيه دي لعب عيال*أنا مسئول منيش عادي
وكان لازم تجيلنا حماس!*ما انا محتاس أهه وراضي
أنا لازم أفوز بالكاس*وغيظ الناس دا شئ عادي