نوم الصايم شعر/خميس نصر

ياللي قلبت نهارك نوم
والحجة صايم طول اليوم
كسلان عن الشغل ووخمان
ما الدنيا قبلك كات بتصوم
في الشغل رايح متأخّر
نرفوز مكشّر متكدّر
تشخط في كل الناس تنطر
الصوم ماهوش مفروض للنوم
ليه في نهارك متوتر
على ضبط نفسك ما بتقدر
على لحم إخوانك تفطر
يا تنام يا قرفان ساعة الصوم
دا الصوم يشيع بينّا الرحمة
تبقى القلوب بيه متلاحمة
دا سوسنة وسط الزحمة
منحة من الحي القيوم

والشعب يعوم في الشهوات شعر/ خميس نصر

والشعب يعوم في الشهوات

النايلسات فات
وفي ديله حزمة قنوات
رح نفطر قنوات الموضة
والساقع يبقى كليبات
هنهيّص ونهجّص يامة
والشعب يعوم في الشهوات
وهتبقى نانسي وشكيرا
قدوة لخالتي أم الشحات
ونشارك في برامج تافهة
وننجّحها بالاتصالات
ونقطّع من لحم العايش
ونحرر أرضنا بصاجات
وهنقرا بختنا والطالع
مافي مانع نشبع تفاهات
والشعوذة ندّي لها مساحة
ده الساحة تحتاج كفاآت
لاجل الناس في الهيصة بتبلبط
ونعبّط في المؤتمرات
ونقول حققنا المستهدف
ونسطّرها في الاجتماعات

إكرم ضيفك في رمضان شعر/ خميس نصر

إكرم ضيفك في رمضان
من حق الضيف إكرامه
وخصوصا وقت صيامه
يبقى المعزوم قدامه
حاجة تفرّح بصحيح
النشا ويّا البروتين
والسلطة كتير فيتامين
والمشروب للتسخين
والحلو يكون تفاريح
إن كان فيه رز كفاية
وبلاش مكرونة وصاية
ده بيفطر موش في رواية
ولاّ في حصة تعريف
بالمشويات والمقلي
غير المسلوق والمغلي
وطعام من بحري وقبلي
واصناف الشتا في الصيف
في لساني ولا تنساني
خلّي الإكرام رمضاني
أكل لواحد ربّاني
ها يصلي ويبقى خفيف
محتاج الصوم لإرادة
إيّاك تنسى إنه عبادة
والتقوى تكون في زيادة
نحتاج ثورة تصحيح
يبقى البروتين نوع واحد
وطعام على قد الواحد
والكل يقوم ويساعد
ست البيت في التنضيف
ندّيها الفرصة تصلي
ولصرح إيمانها تعلّي
تقرا في مصحفها تملّي
ونقلل في المصاريف
موش زوجتك تقضي في يومها
في المطبخ تهدر صومها
بتكتّر ليه في همومها
فكّر وبلاش تخاريف
وفّر قرشك لفقير
مسكين وعياله كتير
هايشتّ من التفكير
يكفيه لو حتى رغيف
الصوم دا عبادة عظيمة
موش أكل وقلة قيمة
ولا حلويات وبسيمة
ولا نوم يابو دم خفيف
أنا بادعي الناس الصايمة
تلغي الإسراف م القايمة
تختار البركة الدايمة
وتخفّف م التكاليف

جوعه وعطشه ملهوش عوزة شعر: خميس نصر

جوعه وعطشه ملهوش عوزة

صايم وبيفطر عالبوظة
وأخوه بيسلّك في الجوزة
والتالت بيسلّي صيامه
بعمايل ناقصة ومنبوذة
يتفرّج على أفلام هابطة
مفتون بالخِلق المهزوزة
ومقضّي صيامه على القهوة
للدمنة وللعب بيهوى
بيضيّع صومه على سهوة
جوعه وعطشه ملهوش عوزة
وبنات آهي ماشية بتتدلّع
لابسة البديهات وبتتطلّع
والبطلونات اللي تشجّع
لرذيلة وقاطعاها بلوزة
وسحور راقص موش عارف ليه
وشيش رمضان برضك من إيه
وسهر للصبح ولاد الإيه
وتذاكر سينمات محجوزة
وضياع أوقات من غير داعي
لا فقير ولا مسكين بتراعي
في الخير غفلان منتاش ساعي
في اللغو رجولك مغروزة
ونسيت المصحف والجامع
ولرأي الدين منتاش سامع
كان نفسي المحفوظ يتراجع
دا كلامي بألفاظ مفروزة
دا حرام تخسر يابني الرحمة
تغفل وتضيع وسط الزحمة
وبتصريفك تضرب لخمة
مزروع قدام التلفوزة
ما تصحصح بقى قبل ما تخسر
لسة الفرصة قصادك تقدر
من قلبي بأكد وباذكّر
بطّل يا حبيبي النرفوزة

حوال مخبرين شعر/ خميس نصر

واحد مخبر عاوز يفطر على حسابي
يا يرميني بتهمة إني إرهابي
وبيقول لي تجيب لي فلوس
هتبقى أعز أحبابي
هتبخل أو هتتأخر
ده بيأثر في أعصابي
رح اتوتّر وأتشطّر
وازرّك عند أصحابي
معاكش فلوس هات الساعة وانا عارف
هتدعي عليّ في غيابي
ما يشغلنيش دعا ك يا ظريف
هاقول إن انت إرهابي
ومين فينا هيتصدّق
أكيد موش إنت دا جنابي
أنا محمي برغم الزور
وتصبح برضه إرهابي