وادخن ليه؟!!! شعر/ خميس نصر

وادخن ليه؟


وادخن ليه وانا عارف
بإن الشرع حرّمها؟
وادخن ليه وانا شايف
مصير ملايين تعفّرها؟
وادخن ليه وانا جامد
ونفسي ربي حررها؟
وإيه هايجيني م التدخين؟
غير الأمراض وأكل الدين
وهادخل بعدها التكهين
وأهلي تنكوي بنارها
دي أول خطوة للإدمان
تجيب ميت نوع من السرطان
يعيش الأهل في الحرمان
ده غير أمراض يصدّرها
لإبني وأم أولادي
وما استطعمش يوم زادي
واورّث كل أحفادي
بلاوي كتيربينشرها
يجيب الربو والكحة
وصوتك تقتله البحة
يهد الجسم والصحة
تقاوي المر يبدرها
يا صاحبي اللي ابتليت بيها
خاصمها يالاّ وارميها
وجدد نيتك فيها
معاك المولي يسترها

مركبة شعر/ خميس نصر

مركبة
ياللي طلبت الأجوبـــــة أفكارنا موش مترتبة
شايف شقق فاضية كتير والخلق ليه متعذبة ؟
كأننا من غيـــــر خشب بنقول صنعنا المركبة
آدي الولد خرع ضعيف والبنت موش متأدبـة
بتحط ظل اخضروروج وتقول ده أنا متحجبة
من يوم ما كتفنا الحــيا واحنا حياتنا مكركبة
وسلاحنا دايب م الصـدا وسكينتنا مشرشبــــة
وهجرنا قرآن ربنـــــــا والاقتصاد أصبح ربا
والملتزم مـــــــن جهلنا صارت إيديه متلهلبة
يا خلق فوقـوا وارجعوا علشان تسير المركبة

العيد في القدس شعر/ خميس نصر

العيد في القدس

أتانــــا العيــــد وعيــّــدنا وطعــــم البهجة يسعدنــــا
لبسنـــا جديـــد وجددنــــا وسطرنا صحيفة فــــــرح
أكلنــــا كتــــير وســـددنا فاتورة جوعــــنا وصمودنا
لعبنـــــــا لمــــــا أكــــدنا بإن الكــــل ناسي الجـــرح
وشفت على الشاشات ناسي لطعــــم الحـــزن بتــــآسي
تقــول القــدس أنفاســــي بيكتمها نــــزيف الجــــرح
ولابسين السواد أطفـــال يدوقــــو الظلــــم والأهوال
تقول يا باغي عهدك طـال واحشنا الابتسام والفــــــرح
حصـار الدبابات كاســـي وصوت القتل فوق راســــي
يـــداوي الأم ويـــــواسي أدان الأقصى أعظــم صرح
يقــول الطفـــل كـــراسي ملطخ بدمـــــا نــــــــــاسي
وباشرب من مرار كاسي وحالي موش في حاجة لشرح
أنا جدي صلاح الديـــــن نشيدي النصر فــــــي حطين
لو الأعداء تكون ملايـين بدمي راح نداوي الجــــــرح