misr

حبيناها شعر:خميس نصر

حبيناها

شعر:خميس نصر
بالرغم من كل المظالم حبيناها
ناويين نخضر أرضها
نحضن سماها
وندوس عل اللي في سكته
ينكر خطاها
قايمين نعلّي صرحها
نصنع هداها
حالفين نرجّع حلمها
نرحم شقاها
ونقدّم اللي يحبها
ويكون فداها
ونخاصم الي كان حرمها
في يوم صباها
ونسامح اللي في يوم ظلمنا
عشان ضناها
نرفع خيام العزة
من فوق الألم
ونقيم حدود ونحّز
في رقاب الغشم
ونجرّي بحر الحب
حوالين العلم
ونأدب الأخطار
ونبني لك هرم
طوبة دهب
والتانية قلب
ما ينهزم
عن صدر حبك
عمري ما ف يوم انفطم
واصنع براءة فرحتك
يا ام النعم
واكتب سطور حريتك
بدموع ودم
وابني سفينة نجدتك
من غير ملل
واشرب من أبيار حكمتك
شهد وعسل
وازرع ورودي في سكتك
شعر وزجل
وابدر بذور حريتك
وارويه عمل
وأخلي ذكرى محنتك
جرح اندمل
وأمد لك في خطوتك
في طريق أمل
وامسح غشاوة دنيتك
وارمي الكسل
يا بلدنا إحنا لمحنتك
واحنا الأمل

محاكمات آخر زمن شعر: خميس نصر

محاكمات آخر زمن شعر:خميس نصر
مهداة إلى الشرفاء الذين تعرضوا لمحاكمات عسكرية جائرة




الفُجر لما يحاكم العفة*البسمة لازم تهجر الشفة
تلقى الفشل مزروع في كل مكان*رجل الوطن تعتر وتتكفّى
يبقى الغلا فارد جناحاته*الرحمة تتحاصر وتتخفّى
جسد البلد بتزيد جراحاته*والبلطجة في الحق تتشفّى
لما الحبيب بيلمّ خلاقاته*في حضن مين يا خلق نتدّفى
مهموم أنا والقلب نابت شوك*والجرح ما تنفع له مستشفى
الزور كلابه المجرمين حاوطوك*وابن البلد موش مالك الدفة
والموج بيعلا علينا موش شايفين*وقارون ناصب له في الوطن زفّة
فرعون مساعده بجنده وعتاده*وموسى جوّه القصر في اللفّة
مصنوع على عين الإله زاده*التقوى بكرة ترجّح الكفّة
اللي ظلم هتكون نهاياته*الخسف أو في اليمّ يتكفّى
وساعتها لا ينفع ندم ودموع*والحق يحكم .. جرحنا يشفى
والعدل هيقيد في ربوعنا شموع*والصالح اللي هيمسك الدفّة

كلنا عارفين الحل شعر:خميس نصر

كلنا عارفين الحل شعر:خميس نصر

كلنا عارفين الحل
دا الكل هيسعد بيه
هنقوله وموش هنملّ
واللي بنختاره شاريه
نعدل موازين تختل
والناس بتحن إليه
لو نفسك تصلح أمرك
قوم ياللا اتمسّك بيه
هنقول للخالق أمرك
بنطيعه ونعمل بيه
ونسيّر للخير قطرك
والمجد هنوصل ليه
رغما عن أنف الظالم
هنقولها بدون ما نخاف
الصالح يصبح حاكم
وهنقضي على الإجحاف
والمفسد رح يتحاكم
بالعدل وبالإنصاف
الكل هياخد حقه
في البندر والأرياف
والتعبان يدخل شقه
لا هيخرج ولا ينشاف
والمنحلين يتلّقوا
درس ينسّي الإسفاف
وهتسمعنا البشرية
أصواتنا هتبقى لفوق
وحقوق الجار مرعية
والآخر يلقى الذوق
راس المغرور محنية
وسلاح الردع يدوق
الحل في منهج كامل
من عند إله الكون
يحمي الفلاح والعامل
والمستثمر مضمون
لابيظلم ولا بيجامل
والعدل يصير ويكون
بيساوي ولا يتحامل
على مخلوق مهما يكون
الحل في مصحف حاكم
وابن الإنجيل منصان
لا استثنا في أي محاكم
والعدل بأقوى لسان
وهنتقاضى ونتحاكم
وننول حق الإنسان
وندوس الندل الظالم
ونعيش معنى الإحسان