وسرقوا الحلم شعر:خميس نصر

يا عيب الشوم
صحيت م النوم
لقيت فيه خلق سارقاني
حروف إسمي
سابت جسمي
وجسمي عطوه
واحد تاني
وسرقوا الحلم
من راسي
وسرقوا الخشبة
من فاسي
وخانقين حتى
أنفاسي
وانا عايش
في أكفاني
وودوني
زمان
فيه الجِمال ناخّين
لقيت نفسي
بمخ تخين
وإخواني
بقم مساكين
مانيش عايش
في أزماني
ولا ساكن في أوطاني
ولا حافظ لعنواني
وحتى الإسم
كان فارس
بقى مفروس
وحطّوا مكان
متين حارس
ناضورجي جاسوس
يبيعوا العرض يوميا
وياخدوا فلوس
وخاينينك
يا أوطاني
وباعوا كل شئ فيكي
سدودك
أو سواقيكي
بيبانك أو
شبابيكي
وعاوزين يلعبوا بيكي
وحتى الغلب
بيعاني
وآبو البرنيطة بيبرطّع
وطيّاراته بتفرقع
وصورايخه اللي بتكركع
ونفسه الناس داهه تركع
ويسقي الذل خلاّني
لكن بخته اللي مال خلاّه
جعل من ألعبان
مولاه
نسى ان المولى
في علياه
ما يرضى الظلم
م الجاني
جاهل يتحدى رب الكون
ماخدش العبرة
من فرعون
ولا النمرود
ولا نيرون
عايش في الكبر بيعاني
هيجني إيه غير الذلة
وهنسوقه بفرقلة
ونكسر في قفاه قلة
يحرّم ييجي هنا تاني
ولاد الهرمة فاكرينّا
مافيش لازمة لتكوينّا
عشان حبة حوّش بينّا
على قلبك
يا أوطاني
ما تصحوا وصحصحوا وشوفوا
وحواليكم يا ناس طوفوا
يا خلق الله حرام خوفو
يكعبل كل أوطاني