قصيدة مهداة لطفل فلسطيني شعر/خميس نصر

الصوت خفت

لابس قميص مكوي قديم
وبنطلون م اللون عديم
ماسك إيدين أخته وأخوه
والقرش في إيديه اتحرج
هيجيب به إيه
وهيعمل إيه
مصاصة ولا لبان
ومرجيحة عمك فرج
الواد حزين
كتم الأنين
زاده الحنين
للعب في يوم مفترج
راسم خياله حاجات كتير
نفسه في شخليلة ونفير
الحلم في ذهنه كبير
لكن سمع هيصة وهرج
وفي لحظة شاف
أخته اختفت
والصوت خفت
والطفل من خوفه عرج
الدم كاسي السوق
والإبتسام مشنوق
من صدمته مخنوق
والعيد أخد بعضه وخرج
أحمد بكي قال يا كريم
إرحم دموعي يا رحيم
إقضي على غادر لئيم
يارب عجل بالفرج