الحر والعبد شعر/ خميس نصر

الحر والعبد

الحر مضروب بالعصا
والعبد يكتب ميت مقال
عايش في لعب ومهيصة
بيسفّ مال
بيلغّ شغّال مصمصة
على أي حال
والحر عيشته منغصة
رغم انه عال
علشان جنابه كتير عصى
أهل الضلال
علشان ما يرضاش منقصة
واكل حلال
وعشان يحارب من عصى
زي الجبال
الظلم بدّه يحطمه
ضيّ الهلال
لكن منوّر حيّنا
وماهوش خيال
بيسرسب النور في السما
فارس وصال
مايهمهوش إن العمى
ناكر جمال
بيبعتر النور والأمل
إبن الحلال
ويكتّف الخوف والكسل
يادي الجمال
الحر مضروب بالعصا
لكنه قال
إن العصا للي عصى
والمصلحين
في خير حال