همسة

همسة
شعر/ خميس نصر
ما تيجي نفضّها سيرة
يا ست يا عاقلة وأميرة
تكوني زوجة في بيتك
وخفّي توابل الغيرة
تحلّي بالثقة في نفسك
وحلّي اللغز في ستيرة

دة إنت واللي في سنك
مؤكد فاهمة وكبيرة
أحنّ على الحبيب منّك
حرام تبقى السكرتيرة
كوني له أحلى ما يشوفه
أنوثة بجدّ وخبيرة
وإحسانه ومعروفه
ببسمة أو بتذكيرة
هتبقى بكرة في رصيدك
وسوء الظن تعكيرة
ما قلتش تنسي إنك أم
لكنك زوجة ومديرة
ووسواس الشيطان بيغمّ
بكتر ذنوب وتكشيرة
يخلّي البيت كئيب ويغمّ
ويتفجّر بتأشيرة
كفاية وطوّري في حالك
هاتحمي البيت بتغييرة
بسيطة تطوّلي بالك
ما تبقيش رهن تأثيرة
أكيد هاتبدلي ظروفك
واظنك عاقلة وكبيرة