إخشّنّ شوية

إخشّنّ شوية

شعر/ خميس نصر

إرمي اللبانة اللي في بقك
لااجيب لي شومة وأدقك
ومن السلالم رح أزقك
تقع مدشدش حالتك طين

إخشن حبة يا واد عمي
وضعك مزود من همي
أصل اللي بيعكر دمي
إنك من الناس العاطلين

لابس مشجر ومحزق
على شعرك الجيل ملزق
عمال في شكلك بتهزئ
طب قول لي أهلك ليه ساكتين؟

ما في حد من بلدك عاجبك
إيه اللي م الأخلاق حاجبك؟
شغال بتلعب في حواجبك
سيبك من الناس الوحشين

نفسي أشوفك متحرر
راقي وعقلك متنور
على سكة الحق تدور
وتبقى م الناس الحلوين