فلفل شطة شعر:خميس نصر

فلفل شطة

حطة يا بطة يا فلفل شطة
آدي الشاشة
بقت زلبطة
جايبين حبة ناس منحطة
تقفل كل بيبان الخير
حطة يا بطة شوف واتفرّج
منظر أولادنا بتتخرّج
بقوا عاطلين والدولة تهرج
لبسوا كل الناس طراطير
حطة يا بطة العيش فيه أزمة
واعتراضاتنا مالهاش لازمة
م الوقفة غيّرت الجزمة
دابت رجلي من الطوابير
حطة يا بطة فتاوى عجيبة
من مفتين عايمين في الخيبة
ساكتين على كل الهليبة
في عقولهم حاطين جنازير
حطة يا بطة ولاد الحارة
يشربوا بانجو يلفوا سيجارة
تايهين وسط الحتة حيارى
ماشيين مشوار التدمير
حطة يا بطة بنات عريانة
والشنبات في النوم غرقانة
والعفة صرخت آه يانا
ضاع عنواني من التبرير
حطة يا بطة الفن وراثة
والمذيعين واخدينها غلاسة
خسة وجبن وخوف ومياسة
نفسنا نلقى في يوم تطوير
حطة يا بطة دروس خصوصية
بالعة الشيكات والنقدية
فين الأخلاق والتربية
إمتى يكون للبعدا ضمير؟
حطة يا بطة المنتخبين
أخدوا موبايلات والبطاطين
باعوا ضميرهم للشاربين
دم الأمة في أكبر زير
حطة يا بطة كتير نواب
لا اتعلموا ولا فتحوا كتاب
يتجمّعوا علشان كداب
قاعد على عش الدبابير
حطة يا بطة ولاد الإيه
خلوا المليم يبقى جنيه
وبقوا الأولاد يشتروا بيه
قرطاس لب ما عادش كبير
حطة يا بطة الدين حبسوه
جوة الجامع بس سابوه
في إيدين ناس سهيانة تتوه
لاجل المخبر عاز تقرير
حطة يا بطة باعونا رخاص
واللي اشترى تافه هلاس
ضيّع كل الخلق وهاص
واللي يعارض ليه سواطير
حطة يا بطة هموم خانقانا
والإحباط إيده محاوطانا
بس الخير ساكن جوانا
كل أملنا في التغيير