محلا شروق شمسنا شعر:خميس نصر

محلا شروق شمسنا

شعر:خميس نصر

يا شمسنا يا مشقشقة
للضي صابحة مفرّقة
محلا شروقك واللقا
صاحية جميلة ملألأة
باعتة سمارك للوشوش
بتزغزغي الطير في العشوش
وعيوننا من تحت الرموش
موش قادرة تبقى مبرّقة
عدّي على الناس في الغيطان
إرمي السلام فوق العيدان
روحي احضني الفلاّح كمان
من حبه إيده مفأفأة
يا شمس ليل الإنتظار
طوّل يا جايبة لنا النهار
يا مرحبا بأم الخضار
والدنيا جوّة الشرنقة
يا شمس لفّي الكون بنور
شمّي الروايح م الزهور
وخشّي عالدور والقصور
كوني لنشاطهم ملتقى
يا شمس قولي للقمر
نوّر مادام ربك أمر
تبعت في ليلك للبشر
النور في حتة محندقة
يا شمسنا ضمّي
روح بوسي إيد أمي
واحكي لها عن همّي
يالا روحي لها بقى
يا شمس خفي من اللهيب
عن الولاد وعن الحبيب
خلّي جراحاتهم تطيب
دول مغروزين في المحرقة
يا شمس روحي للغلابة
إحكي تاريخ عهد الصحابة
دول قلبهم معجون طيابة
خشّي الحواري الضيّقة
يا شمس لما تغربي
اسقي الصبية والصبي
من شهد نور سيدنا النبي
كل القلوب متشوّقة