يا ملايكة الأرض الأبية
شعر:خميس نصر
يا شهدا يا أكرم بشر صاعد
يا حلمنا الواقف ماهوش قاعد
يا مركبة بالجرح بتباعد
يا ملايكة الأرض الأبية
يا نفوس لكن إيدها سخية
يا قلوب ما تعرفش الدنية
يا إيدين بتغزل
توب بيستر
عورة الناس في البيوت
يا سيول بتغمر
كل أشكال السكوت
يا ضلوع ساكنها
حب أوطاني
يا دموع شايلها
التار من الجاني
وعزيمة تكسر
وهم سجّاني
والله إنتم
موش بشر عادي
إنتم شعاع النور
لأولادي
والمولى فيه
بتحب وتعادي
يا راسمين
لوحة أمل للناس
ومركّبين الحكمة
بالإحساس
ومطهرين السكة
للحراس
يا ملايكة مخطوبة
لبنات الحور
متحنيين والحنة
ضي النور
بايعين حياتكم
لاجل تبقى سرور
نفسي أكون
واحد من الشلة
اللي صدورها
تشفي م العلة
وقلوبها عمرانة
مفيش ذلة
والدم لمّا يفور
يحرر جيل
وتفكّر العدوان
بجيش أبابيل
وتغسّل الأحباب
من التضليل
وتكون حياتها
آية وعلامة
وهتبقى بين المصلحين
شامة
ترفع مابين الكون
لنا القامة
يا شهدا يا أكرم بشر صاعد
يا حلمنا الواقف ماهوش قاعد
يا مركبة بالجرح بتباعد
ليست هناك تعليقات:
إرسال تعليق