ورضينا حكم عدونا
شعر:خميس نصر
أصل القضية إننا
هجرنا أحكام ربنا
سبنا ولادنا في العرا
ورضينا حكم عدونا
شبّكنا إيدنا مع الفساد
ونسينا أحلام العباد
وخاصمنا تاريخ البلاد
ونسينا م الخوف نفسنا
أصل الحكاية باختصار
إن العدو فارض حصار
وفي إيده كرباج الدمار
واحنا طاوعنا جهلنا
معقولة نرضى بالسكوت
وف كل يوم أطفال تموت
لا أمن فيه ولا حتى قوت
بتموت ضحية عجزنا
يا مؤمنين عاوزين قرار
يوقف حصار جيش الدمار
ونرجّع النور للديار
بوقفة تبقى لربنا
الشعب في غزة اكتوى
موش لاقي لقمة ولا دوا
والمجرمين أهل الهوى
بيمصوا دمات أهلنا
صرخة مريض لدواه يعوز
ودموع فقير مسكين عجوز
بيقول بلادنا يا ناس يجوز
قافلين بيبانها في وشنا
فين القانون فين الضمير؟
فين مجلس الأمن الضرير؟
ياما سمعنا كلام كتير
لكنه موش مخصوص لنا
لو عندنا ذرة إيمان
نجري نفتّح في البيبان
ونأكل الطفل الجعان
لو تمنه هيكون عمرنا
حبة غفر عاملين جيوش
عن العدا واقفين تحوش
ومسودين كل الوشوش
بايعين خواتنا وأهلنا
فاردين دراعهم لليهود
ومنفذين كل البنود
وهمّا خاينين العهود
لكن مخاصمين شعبنا
محتل من قلب البلد
كان من زمان فيها اتولد
وعلى ولادها بيتسند
لكن مهواش مننا