وشوشة شعر / خميس نصر

وشوشة
خميس نصر
يا أرض النيل
رح أهمس لك
وأوشوش لك
ببعض كلام

على جرحك
ها ملّس لك
وادعبس لك
عن البرشام

وهابني لك
وأسس لك
قصور أحلام

وها حكي لك
وأشكى لك
بدون أوهام

وها كتب لك
وها بقى لك
بطل أفلام

واغنّي لك
مواويلك
وكلّي غرام

وها بقى لك
ولو هالك
عيون ما تنام
وها قرى لك
واسمّع لك
حكم وكلام

أنا صاحى مانيش ميت
أنا مولود من الأيتام

ها كب الربعة في حجرك
وأريح راسي على صدرك
وأقوم وأنام
ما يشغلنيش أكون مهضوم
لكن عايزك تصحّي النوم
وتبقي تمام

ما يعجبنيش تشيلي هموم
وسايبة ليه قطيع البوم
بقى قدّام؟

ما يرحمنيش صراخ مظلوم
وجوع محروم
وعيني تنام
ما يعتقنيش ضمير مجروح
وكتر النوح
وغدر لئام

ما يسعفنيش قصيد وكلام
في طول إجرام
وظلم إمام

ما يسعدنيش أكون قلبك
وأشوف غلبك
وأعيش أوهام
لإمتى تغمّضي عني
وأنا ولدك
بقى اسمه كلام؟

لإمتى تديري وشك
وأنا معاكي
بقى اسمه كلام؟

أنا غلطان يا حلوة
في إيه؟
وجرحك قلبي
حاسس بيه
كفاية حرام

وأنا لجرحك طبيب
أداويه
في حضنك شايلة
جاحد ليه؟
كفاية حرام

وأنا قلبي حضن قلبك
يبوس رجليه
كفاية حرام

يا أرض النيل دموع عيني بترويكي
حروف إسمي عروق جسمي بتحميكي
من الأزلام

يا رسم البصمة في إيدي
يا شايلة الدم في وريدي
يا ساكنة حتى في الأحلام

أنا جايلك أفك القيد
أنا شايلك بأطهر إيد
أنا جاعلك لقبي إمام

يا أرض النيل صور يامة
شخوص يامة
وشوش إجرام

يا أرض النيل قصص حلوة
وكام غنوة
وقلب حمام

طاير بيكي يرقّيكي
يشيل إسمك يغنيكي
ماهوش قدّام

لكن مجروح وعينه تبوح
وكتر النوح
يقول ده حرام

أنا نايبك ولو سبتيني
موش سايبك
هاكون جايبك
وأقول ده حرام

تعالجي بس في صداعك
وأوجاعك
من الأورام
ورم إسمه البعيد واسطة
ورم إسمه الجديد توريث
وأقول بكفاية ظلم حرام

يا أرض النيل كفاية سكوت
كفاية حكم بالنبوت
لازم ندّي البعيد شلوت
يخلّي الناس تعيش في سلام

يا أرض النيل يا فرّازة
بتفرز شهدها المعهود
كفاية حرام

مفيش عازة لدي جوازة
جواز الأمة م النمرود
كفاية حرام

غارز في قلبي عكازة
وآدينا خلاص بقينا جدود
كفاية حرام

ده كل الخلق مضّايقة
وحتى ولادنا موش طايقة
كفاية حرام

يا أرض النيل أنا ميت
في دباديبك
ويفرحني أكون ميت
بموت ديبك
ساعتها تعطّري طيبك
وعيني تنام