موش ممكن تموت

الكلمة ورداية لبلدنا تشمّها
الكلمة سلاّية في حلق
اللي يحاول هزّها
الكلمة مسمار
نعش أفيال أبرهة
الكلمة لو مارد يفوت
الكلمة موش ممكن تموت
لو حبر دوايتها اتعجن
في مية النيل أو سكن
في قلب أبناء الوطن
الكلمة موش ممكن تموت
الكلمة لو متسحّبة
في النفس من طول سحرها
الكلمة لو متأدبة
بالحق هنآ من لها
الكلمة لو متعجبة
م القهر يا طول صبرها
الكلمة موش ممكن تموت
الكلمة لو شرنقة
تغزل خيوطها حرير
الكلمة لو مطرقة
بتكسّر الجنازير
الكلمة لو ملتقى
بيجهز المغاوير
الكلمة موش ممكن تموت
الكلمة لو جايبة النهار
الكلمة لو طوبة عمار
الكلمة لو بسمة في حوار
الكلمة موش ممكن تموت
الكلمة لو واست حبيبها
الكلمة لو حسيت لهيبها
الكلمة لو هيموت كاتبها
الكلمة موش ممكن تموت