لازم ترحل يا حافظ بيه

لازم ترحل يا حافظ بيه شعر / خميس نصر

يا حافظ بيه لازم ترحل عشان مسئول
قاعد في وسط مرؤوسيك بتفطر فول
لازم تنشال لأنك موش غبي وطبّال
لأنك البعيد إنسان

لازم ترحل لأن الناس كتير ظبطوك
نضيف موش مرتشي وخبير ولو سألوك
تقول الحق لا تألف ولا تلزّق ولو أغروك
ولا منافق ولا فتّان

عشان تسمع لشكوتنا لازم تنشال
عشان تنفع لأزمتنا لازم تنشال
بسيط ناجح وبتطبطب على العمال
خصوصا الولد شعبان

لازم يشيلوك لأنك تكشف المستور
وتتعامل بعقل كبير ماليه النور
بتحلم إن مرؤوسك يعيش مستور
وما يمدّش إيديه للخلق أصله جعان

لأنك زهرة وسط الشوك
ومنتاش في الفساد معكوك
ومنتاش عاجب اللي جابوك
ما عندك لف أو دوران

لازم ترحل لأن الناس بتهتف لك
وعالباب موش حاطط قفلك
تسيب الكرسي أشرف لك
وتبعد عن قطيع غربان

لأن الشعب بيحبك لازم تنشال
لا متبزنس ولا بتلهف من الأموال
ولا عينك توطيها بفعلة خسيسة أو بطّال
معاكش فانوس طالع منه متين مرجان

لازم ترحل عشان موش متهم وبرئ
لازم ترحل عشان موش مفتري وصديق
لازم ترحل لأنك محترم وجرئ
عشان الحل متيسر وفي الإمكان

لأنك البعيد طاهر ودول أنجاس
لأنك مجتهد ماهر وموش هلاّس
تعيش ازاي ما بين عالم بدون إحساس
مفيش ليك في الوزارة مكان
مفيش ليك في الوزارة مكان