إحميني من ناسك
صليت على أرضك
وشربت من وردك
أديت كتير فرضك
يا مصر أنا في عرضك
إحميني من ناسك
صابرين وبنحاول
ع العجز نتحايل
وبنعدل المايل
والظالم الجاهل
بيوطي في راسك
يا مصر باشكي لك
من نفسي أحكي لك
راح امد وآجيلك
روحي راح اديلك
قومي ارفعي راسك
الغدر بيأسس
وفي ليله بعسس
ع الناس بيتجسس
أعمى وبيحسس
وفي سكته داسك
يا مصر يا حبي
يا حتة من قلبي
طول عمري متربي
ماشي وانا في دربي
عايش بإحساسك
يا حلو يا سمرة
في الضلة والقمرة
لو اعيش على تمرة
وانا ماسك الجمرة
راح ترفعي راسك
الخلق في بلادي
بتحب وتعادي
وتناحي وتدادي
ويقولو يا هادي
وهيرفعو راسك
السبت، 26 مايو 2007
إحميني من ناسك شعر/ خميس نصر
الاشتراك في:
تعليقات الرسالة (Atom)
ليست هناك تعليقات:
إرسال تعليق