النادي الأهلي

النادي الأهلي شعر / خميس نصر

ألا ليه يا عم صالح
النادي الأهلي اللي فالح
رغم طوفان الفشل؟

قال لي لازم يبقى ناجح
أصله موش شلة مصالح
عنده ناس زي العسل

إختاروهم دون مجاملة
فيه تساوي في المعاملة
مافي دافع للكسل

جم بمعيار الكفاءة
موش بواسطة أو حداقة
الفريق كله اكتمل

عندهم من ونج لفت لباك يمين
كلهم متفاهمين كلهم متدينين
ولكده همة الأمل

اللي أبوه بيشيل في طوب
واللي كان نجار يدوب
والميزان هوة العمل

موش أبوه كان المدير
ولا كان جده الوزير
سيبك إنت من الدجل

وانتخاباتهم نضيفة
اللي جابت ناس شريفة
ما فيهاش رمز الجمل

اللي عاوز بلده تفلح
واللي نفسه أهله تنجح
موش يقول معمول عمل

يقضي عالواسطة اللعينة
يكرم الناس الأمينة
يجعل الأهلي مثل