الست دي أم ولادي

الست دي أم ولادي

شعر: خميس نصر

الست دي أم ولادي
من حقها كل ودادي
من جوّة قلبي وبنادي
يارب تحفظها لي يارب

الست دي عارفة حقوقي
هيّة مسايا وشروقي
هيّة انفعالي وهدوئي
وبارّة بالأم وبالأب

الست دي قارية لراسي
وعايشة نبضي وإحساسي
تدعي تشجع وتواسي
يارب تحفظها لي يارب

الست دي قلبها طيب
والدمع في عينيها قريّب
ما عمرها في لحظة تغيّب
عن طاعة الوالدين والربّ

الست دي حافظة كتابها
والخير يخبّط على بابها
قلبي بيعشق أحبابها
يارب تحفظها لي يارب

الست دي شمعة تنوّر
طلتها عالكون بتزهّر
قلب الحسود منها اتعوّر
يارب تحفظها لي يارب

الست دي أحلى رواية
عاشها قلبي في دنيايا
يارب تجعلها نهاية
في الجنة أسعد بيها يارب