فاضل إيه بس نبكي عليه؟! شعر/ خميس نصر

فاضل إيه بس نبكي عليه ؟

حصار الخوف هنقضي عليه
صبحنا في زمان التيه
غلبنا معاك يا إبن الإيه
فاضل لإيه بس نبكي عليه ؟

آدي الأسعار بتكوينا
قائدنا موش سائل فينا
حاطط بؤسه وشقاه فينا
صفار البيضة بق بجنيه

جهاز إعلام بيتباهى
بشلة تافهة بالعاها
وبالأزمات محاوطاها
بتلعب في دماغنا يا بيه

بنستورد أكم أشياء
تزود لينا في الأعباء
نظام فاشل مصاب بغباء
صحيح ولا انتو رأيكو إيه ؟

بيستورد فانوس م الصين
ويمضي كويز مع الملاعين
نظام عاجز ومخه تخين
قليل الحيلة قاعد ليه ؟

بتدي للعدو المحروق
رخيص وبنص سعر السوق
لو انت بتشرب المدعوق
قولولي الناس دى ذنبها إيه ؟

يبيعو غازنا للأندال
ده بكرة تلعن الأجيال
حكومة بفعلها البطال
تخلي الشعب مدين ليه ؟

آدي الشعب اللي سممتوه
بأمراض الخبيث صبتوه
برغم إن انتو عشمتوه
فاضل إيه بس يبكي عليه ؟

هيتحرك هيتحرك
عبيط برضه السكوت غرك
لمزبلة التاريخ جرك
فاضل إيه بس نبكي عليه ؟