في دولة حمارستان

في دولة حمارستان شعر/ خميس نصر

حمارستان دي دولة
بس حلق حوش
رئيسها حمار
ووزراؤه تيوس وجحوش
وعنده م الخراف مليون
وأمن وحوش
وجيشه من الأرانب
متين هارب
فاتل شارب
آكل شارب
ومين هيحوش؟
على حمايته
ما يتآمنوش
وفي ذكري يوم الانتصار
يقوم فخامة الحمار
يخطب ينهق في الجيوش
وبعد فخامته ما اتمرّغ
قعد ينخع ويستفرغ
وقال قدامي ميت تقرير
تقول فيه بغل عندي وزير
صحيح كان أبوه وجده حمار
لكن أمه كانت فرسة
وجده حصان
وده أخطر ما في الموضوع
لازم حتما يموت م الجوع
ونرمي سيادته في المشروع
لازم نقطع خبر أمه
نشد التبن من فمه
وأي حمار يشيل همه
أكيد هانلبسه الكلابوش
حتما أطهر دولتي
من أي فهمان أو دخيل
ومن اللي هيلوث وداني
بصوت صهيل
أنا عندي مبدأ شيك لذيذ
أنا ممكن أقبل بالمعيز
وأجيب لهم لو هركليز
ويكونوا في حماية العروش
دولتنا يا شعب في خطر
من شلة مأجورة ونفر
اللي يفكر ينتحر
قدامنا مستقبل حمير
عاوزين وريث جحش وخبير
ويبقى بالمربط جدير
يرفس معارض أو يلوش
صوت البلابل تخرسوه
والقرد لازم تشنقوه
واللي يصوصو حذروه
ولتحيا أصوات الجحوش
ولتحيا أصوات الجحوش