فاضل هبابة شعر/ خميس نصر

فاضل هبابة

خلاص فاضل هبابة
ع الوغد وع الديابة
وبحبة صبر يابا
هنجيب المصلحين

فاضل ع الفتح زقة
وندق بابنا دقة
ونشق الصخر شقة
تحمينا من الأنين

أنا موش سكران وشارب
أحوال الدنيا شارب
بس جحور العقارب
في بلادنا مفتوحين

هنلم الناس بحالها
وهنفكر في حالها
وغيطان الشوك بدالها
هنراضي الفلاحين

نزرع قمح بتقاوي
بلدي إكني ناوي
الناس اللي في قهاوي
أجعلهم منتجين

لاجل ما ناكل ونشبع
وبصرح بلادنا نطلع
فوق السحاب ونتبع
خطوات الصالحين

يا بشر يا أي حاجة
بطل رغي وسماجة
دي أرض النيل في حاجة
لإيدين الفلاحين

موش عاوزين نستخبى
فاضل ع النصر حبة
شايف ع السطح قابة
جتت المتحنطين

يلا نأدن في ناسنا
تيجو بينا نعلي راسنا
ناكل قوتنا بفاسنا
بالناس العرقانين