استيراد وتصدير شعر/ خميس نصر

بنستورد بليلة وفول
وبنصدر حماة الغول
كتير م الكوسة والخلطة
وقرنين شطة في المعقول
ونستورد حاجات تكسف
حاجات تنسف
طموح لشباب
ونفتح بيتنا للأغراب
وللإرهاب
ومين مسئول؟
وفول رومي
وأفريقي وإغريقي
وعدس الصين
ودوم ومنين
وشايلين طين
ومين هيقول؟
بنشقى عشان نشيل محاميل
نرد جميل لناس مساطيل
وكل فلوسنا تتسرسب
وتتكركب في حلق الجول
ومحتكر الحديد عمّال
على بطّال
بيلهف مال
يعبي البلد في شوال
ويوقف حال
لجيش عمّال
وكام طبّال
يقول معقول
بقى يصح إن البلد تنباع
وتصبح ديل من الأتباع
وعم بتاع يقول معقول
يا عم بتاع خلاص هانت
وبرضك لبتك بانت
شعوبنا بحكمتك عانت
ما تنجحشي ولا بمقبول
يا عم بتاع بلاش تبرير
ولا استخفاف ولا تزوير
كفاية فلسفة وتنظير
شبعنا وعظ م الدلدول